Fréttir

Ráðstefnugestir heimsækja Héraðsskjalasafnið á Akureyri

Síðdegis í dag lauk ráðstefnu Félags héraðsskjalavarða með aðalfundi félagsins. Fræðsluerindin stóðu fyrst til hádegis en um hádegið hélt hópurinn í mat á Amts-Kaffi-Ilmur. Að snæðingi loknum var gengið um  húsnæði Héraðsskjalasafnsins á Akureyri og skjalaverðir leiddu hópinn um geymslur og ganga, skrifstofur vinnurými og lestrarsal. Þess má geta að geymslupláss safnsins mælist um 2,6 hillukílómetrar, en um það bil 1,6 hillukílómetrar eru þar af skjölum.

Ráðstefnan gekk vel í dag

Ráðstefna Félags héraðsskjalavarða á Íslandi sem haldin er í Rósenborg gekk vel fyrir sig í dag, þar kom margt fróðlegt, gagnlegt og skemmtilegt fram sem fundarmenn taka heim með sér. Fjallað var um skjalavörslu grunnskólanna, ljósmyndaskráningu á söfnunum, sameiginleg söfnunarátök, aðfangaskráningu og rannsóknir á skjalasöfnunum svo nokkuð sé nefnt.

Ráðstefna Félags héraðsskjalavarða haldin á Akureyri - Lokað á safninu 27. og 28. sept.

Dagana 27. - 28. september verður haldin hér á Akureyri ráðstefna Félags héraðsskjalavarða á Íslandi, nánar til tekið í Rósenborg. Þetta er í annað sinn sem slík ráðstefna er haldin, en hún var áður á dagskrá fyrir tæpu ári síðan í Reykjavík.

Fólkið í kaupstaðnum - Sýningin framlengd

Sýningin fólkið í kaupstaðnum hefur nú staðið í tæpan mánuð og hlotið talsverða athygli og hefur því verið ákveðið að framlengja hana út septembermánuð. Á sýningunni er tekið fyrir, eins og áður hefur komið fram, fólkið sem bjó á Akureyri árið 1862, þegar bærinn fékk kaupstaðarréttindin. Hér að neðan má sjá dæmi um hvernig hver íbúi fær sína umfjöllun, þar sem gerð er grein fyrir ætt og uppruna, hjúskaparstöðu og börnum. Hvert hús fær því e.t.v. mörg svona blöð, allt eftir íbúafjölda hvers fyrir sig.

Hitaveita Akureyrar

Hitaveita Akureyrar var stofnuð árið 1977 en í nóvember það ár var heitu vatni hleypt á fyrsta húsið með formlegum hætti.  Húsið var Dvalarheimilið Hlíð.  Áhugi á að nýta jarðhita til húshitunar á Akureyri var alls ekki nýr en árið 1939 var skipuð nefnd til að veita forstöðu nauðsynlegum rannsóknum til undirbúning hitaveitu.  Nefndin starfaði til 1944 ef marka má fundargerðabókina.

Armstrong í Þorsteinsskála

Neil Armstrong varð fyrstur manna til þess að stíga á tunglið í júlí 1969.  Hann lést 25. ágúst síðast liðinn, mitt í hátíðahöldum Akureyringa vegna 150 ára afmælis kaupstaðarins.  Armstrong kom í hópi geimfara til Íslands sumarið 1967 og tók létta æfingu í jarðfræðirannsóknum á Öskju-svæðinu enda hafi Geimferðastofnun Bandaríkjanna komist að þeirri niðurstöðu að landslag á hálendi Íslands væri mjög svipað því sem væri á tunglinu.