Hver var Kristján? Af hverju Kristjánshagi?

Í mars 2014 kom nafnanefnd Akureyrarbæjar saman til þess að fjalla um nöfn á götum í nýju hverfi, Hagahverfi. Á fundinum varð til listi með 12 götunöfnum, sem nefndin lagði til að notuð yrðu í hverfinu. Eins og bæjarbúar þekkja eru göturnar kenndar við fólk og við val þeirra hafði nefndin það m.a. að leiðarljósi að um væri að ræða kunna látna Akureyringa, sem bæri heiður vegna starfa fyrir bæjarsamfélagið og hefði með frægð sinni og verkum auglýst nafn bæjarins.

„En umfram allt er hann bara skáld”

Kristján Einarsson frá Djúpalæk var fæddur 16. júlí 1916 að Djúpalæk í Skeggjastaðahreppi.

Kona hans var Unnur Friðbjarnardóttir en henni kynntist hann þegar þau voru við nám á Eiðum, tvítug að aldri.

Kristján og Unnur hófu búskap að Staðartungu í Hörgárdal, en það var æskuheimili Unnar. Kristján heillaðist aldrei af búskap og var það svo að fimm árum seinna brugðu þau búi og fluttust til Akureyrar. Það var árið 1943. Í lok árs 1949 flytja þau til Hveragerðis, en þar blómstraði listamannamenning á þeim tíma. Þá var Kristján orðinn þekkt ljóðskáld og dægurlagahöfundur.

Því miður, eins og hjá fleiri listamönnum, þá dugði skáldskapurinn ekki til að halda uppi fjölskyldu og þurfti Kristján þvi að taka að sér hin ýmsu störf í gegnum árin, sem honum þó líkuðu mis vel. Á Akureyri vann hann ýmis verksmiðjustörf og eftir að þau fluttu suður þá vann hann við kennslustörf í barnaskólum, garðyrkju og húsamálun svo eitthvað megi nefna.

1961 flytja þau hjónin með son sinn aftur norður til Akureyrar og bjuggu þar þar til Kristján lést þann 15. apríl 1994.