Hver var Jóninna? Af hverju Jóninnuhagi?

Í mars 2014 kom nafnanefnd Akureyrarbæjar saman til þess að fjalla um nöfn á götum í nýju hverfi, Hagahverfi. Á fundinum varð til listi með 12 götunöfnum, sem nefndin lagði til að notuð yrðu í hverfinu. Eins og bæjarbúar þekkja eru göturnar kenndar við fólk og við val þeirra hafði nefndin það m.a. að leiðarljósi að um væri að ræða kunna látna Akureyringa, sem bæri heiður vegna starfa fyrir bæjarsamfélagið og hefði með frægð sinni og verkum auglýst nafn bæjarins.

Jóninnuhagi er kenndur við Jóninnu Sigurðardóttur en hún var matreiðslukennari og hafði mikil áhrif á íslenska matargerð snemma á 20. öldinni, sérstaklega með útgáfu matreiðslubóka. Hennar þekktasta bók var Matreiðslubók fyrir fátæka og ríka, sem kom út árið 1915 og seldist strax upp. 1916 var hún endurútgefin í sömu mynd en 1927 var Jóninna búin að bæta miklu við bókina og gaf hana aftur út undir titilinum Matreiðslubók.

Jóninna var fædd 11. apríl 1879 og ólst upp á Draflastöðum í Fnjóskadal, 18 ára gömul hélt hún í Kvennaskólann á Akureyri og þaðan til Noregs þar sem hún nam hússtjórn. Eftir Noregsdvölina hélt hún til Danmerkur og fór þar í hússtjórnar- og kennaranám. Þegar hún kom heim árið 1903 fékk hún styrk frá Búnaðarfélagi Íslands til að ferðast um og kenna húsmæðrum á Norðurlandi matreiðslu.

1907 tók Jóninna að sér að reka nokkurs konar matreiðsluskóla í húsnæði Gróðrarstöðvarinnar á Akureyri þar sem mikil áhersla var lögð á að nota heimaræktað í matreiðslu. 1915 keypti hún húsnæði og hóf þar eigin rekstur undir nafninu Hótel Goðafoss.

Á síðari æviárum sínum einbeitti hún sér að því að stofnaður yrði húsmæðraskóli á Akureyri. Skólinn tók til starfa 1945 og var Jóninna formaður skólanefndar fyrst um sinn. Jóninna var sæmd riddarakrossi Fálkaorðunnar1959.

Jóninna Sigurðardóttir lést á Akureyri þann 19. september 1962.